Txartelak

Bisita-txartelak edo aurkezpen-txartelak inprimatutako dokumentu txikiak dira, pertsona baten datu nagusiak jasotzen dituztenak. Adibidez, datu hauek izan ditzakete:

  • Izen-abizenak
  • Kargua edo titulua
  • Enpresaren izena eta logotipoa
  • Helbidea, telefono-zenbakia eta helbide elektronikoa
  • ...

Oso marketin-metodo hedatua da, eta profesionalek asko erabiltzen dute, baita partikularrek ere.
Gaur egun, bisita-txartelak ezinbestekoak dira, oso baliagarriak baitira marka bat zabaltzeko eta kontaktuak lortzeko; izan ere, aurrerapen teknologiko handiak izan arren, enpresa ugarik erabiltzen dituzte oraindik ere. Haiei esker, markaren sinesgarritasuna handitu egiten da, profesionaltasuna eta seriotasuna adierazten baitituzte.

Formatua

Europan, bisita-txartelen tamaina estandarra 85x55 mm-koa da. NANaren eta kreditu-txartelen tamaina bera dute, beraz.

Tamaina ezin hobea da diru-zorroetan gorde ahal izateko, baina, jakina, hori ez da erabil daitekeen tamaina bakarra. Egia esan, hainbat neurrik balio dute produktu-mota honetarako, betiere, aukeratzen den tamaina arrazoizkoa eta praktikoa bada.

Hego Amerikako herrialdeetan, 90x50 mm-ko formatua da erabiliena.
Beste neurri batzuk ere asko erabiltzen dira: 85x45 mm-koa, edo neurri karratuak, hala nola 55x55 mm edo 60x60 mm.

Txartelak diseinatzean, formatu horizontala eta bertikala erabiltzen dira, sortzailearen gustuaren arabera.

Inprimaketa

Bisita-txartelak alde batean edo bietan inprima daitezke, eta aukera hauetako bat erabil daiteke:

  • koloretan (kuatrikomia)
  • beltzez
  • bi koloretan
  • Pantone koloretan
  • aurreko guztiak konbinatuta

Zenbait enpresak eta erakundek irudi korporatiboari buruzko eskuliburua dute, paperezko dokumentuak (kasu honetan, bisita-txartelak) inprimatzean erabili beharreko kolore zehatzak (gehienetan, Pantone koloreak) adierazten dituena.

Euskarria

Txartelak inprimatzeko euskarriak askotarikoak dira. Gehien erabiltzen direnak, ordea, paper iztukatuak, berjuratuak, offset papera eta kartoi meheak dira.

Halaber, oso ohikoa da paper bereziak ere erabiltzea, originaltasuna eta inpaktu bisuala lortu nahian.
Kalitate handiko paper eta kartoi mehe asko erabil daitezke txartelak inprimatzeko.

Txarteletan erabili beharreko gramajeak handiak izaten dira, 250 eta 350 gramo bitartekoak, txartelari trinkotasuna emateko.

Aholkuak

Txartel-zorro, diru-zorro eta billete-zorro gehienek txartelak gordetzeko neurri estandarrak dituzte. Neurri horietara mugatzen bagara, txartelak diru-zorroetan eta abarretan sartzea bermatuko diegu gure bezeroei; bestela, txartelak galtzeko edo paperontzian amaitzeko arrisku handia dago.

Bestalde, gure txartela txikiegia bada, informazioa diseinatzeko eta jartzeko lekua murriztuko dugu, eta irakurtezina edo kargatuegia gera daiteke.

Bisita-txarteletan, hainbat efektu eta akabera erabil daitezke; adibidez, lehorreko hatza, UVI berniza, estanpazioa, formen trokelaketa…
Horrelako efektu eta akaberekin, irudi hobea eman eta enpresaren marka-balioa handituko dugu.

Orobat, oso ohikoa da txartela plastikozko orri batez babestea. Horri esker, nabarmen gehiago irauten du txartelak, baina horrek eragotzi egiten du hartan boligrafo batekin eroso idaztea, esaterako.